春去夏來，如果唔怕熱，最好就係郊遊。
香港郊遊係全世界最方便。去到香港仔大街，沿香港仔水塘道一路行上山，唔使半個鐘就可以逃離城市，到達香港仔水塘。重新接近湖光山色。
沿途會經過天后廟，不妨參觀下，稍一歇腳。香港仔天后廟建於1851年，即係香港開埠無幾耐就已經喺度，見證香港百年滄桑。
去到三岔位，去下水塘方向會快啲，上水塘要行好遠！
行一陣間已經到大壩。天氣非常好，亦都無自由行，頗得悠閒之樂。2009年，六個戰前水塘被列為法定古蹟，香港仔水塘是其一，係香港少有嘅德政。不過話分兩頭，如果無當日一眾義士保衛天星皇后嘅壯舉，就唔會有後來嘅保育政策，呢個特區賊黨集團又點會咁好死。
係下面望返上去，大壩相當雄偉。雖然已經有80幾年歷史，睇落仲好實淨，應該唔係豆腐渣工程，要多謝英國佬。
用紅磚建成嘅水泵房就喺隔離，好有殖民地風情。
返上大壩，發現一批年青人喺度跑步，襯住水塘靚景，唔講仲以為睇緊《KANO》，好有電影feel。
繼續行入去，湖水好綠。
行一陣，返返香港仔避風塘都係半個鐘，吹下海風，望下漁船，不知不覺就一日。
一班阿伯阿婆齊耍太極，唔講仲以為喺深圳。
回程赫然發現某議員辦事處，日光日白整啲咁嘅野，真係慘過見鬼。原本好開心嘅一日就此蒙上陰影，頂。
～完～